પ્રથમ તમે આ બધાથી થોડા અલગ પડો, તો મજા પડી જાય

પ્રથમ તમે આ બધાથી થોડા અલગ પડો, તો મજા પડી જાય;

તમે મને જે કહ્યા કરો છો, તમે કરો તો મજા પડી જાય.

આ પીળાં પર્ણો સ્વયં ખસીને, નવાંની ડાળે જગા કરે છે;

હવે આ પહેલી હરોળમાંથી, તમે ખસો, તો મજા પડી જાય.

ઝરૂખે બેસી તમે લખેલી, સૂરજની ગઝલો સરસ છે કિન્તુ;

કદીક તડકો ઉઘાડા બરડે ઝીલી લખો, તો મજા પડી જાય.

રમું છું, એ જોઈને કહો છો, તમારે તો બસ મજા મજા છે;

તો મારા બદલે રમો આ બાજી, પછી કહો, તો મજા પડી જાય.

પતંગમાં જો પવન ભરાશે, પછી વજન દોરનુંય લાગે.

રમત આ સમજી પતંગ નીચે, ઉતારી લ્યો, તો મજા પડી જાય.

pratham tame aa badhaathii thodaa alag pado, to majaa padii jaay