મારા પછી

અઝીઝ કાદરી

મારા પછી

અઝીઝ કાદરી

Roman

શોકમાં ગરકાવ છે આખી સભા મારા પછી

કોણ સંભળાવી ગયું મારી કથા મારા પછી

અશ્રુઓ પ્યાલાની આંખોમાં છે સાકી છે ઉદાસ

જોઈલો જઈને સુરાલયની દશા મારા પછી

કોણ કરશે મારી પેઠે એ સુંગંધીની કદર

ખૂબ રડશે તારા પાલવની હવા મારા પછી

હું તો છું નિર્દોષ મારો જીવ લઈને કાતિલો

મારા ઉપર આવશે તમને દયા મારા પછી

ખાત્રીપૂર્વક કહું છું કે સતત નિષ્ફળ જશો

યત્ન તો કરશો મને ભૂલી જવા મારા પછી

જીવ પંથે કોણ બરબાદીને લેવા જાય છે

કોણ ભટકે છે વફાને શોધવા મારા પછી

જીવતા જીવે તબીબો મોકલો તો ઠીક છે

કોના ખપમાં આવશે દુઃખની દવા મારા પછી

જીવતાં શૂળો ધરી ને ફૂલ ધર્યા લાશ પર

મારા પર વરસી છે દુનિયાની કૃપા મારા પછી

સાચવીને રાખશે કોણ એની ચિંતા છે “અઝીઝ”

ક્યાં જશે આ મારા દિલની વેદના મારા પછી

સ્રોત

પુસ્તક : તરસ (પૃષ્ઠ ક્રમાંક 6)
સર્જક : અઝીઝ કાદરી
પ્રકાશક : પોતે
વર્ષ : 1997