શૂન્યતાનો રાસ દોર્યો ને લખ્યું કે ‘તું નથી’

શૂન્યતાનો રાસ દોર્યો ને લખ્યું કે ‘તું નથી’,

ભીંતનો અટ્ટહાસ દોર્યો ને લખ્યું કે ‘તું નથી’.

એક ગમતી સાંજ ચાખ્યે કેટલાં વર્ષો થયાં,

આંખનો ઉપવાસ દોર્યો ને લખ્યું કે ‘તું નથી’.

સાવ નિર્જન કોઈ ટાપુ છે હૃદયની મધ્યમાં,

ત્યાં જ કારાવાસ દોર્યો ને લખ્યું કે ‘તું નથી’.

પાંગર્યું છે ઊર્મિલાનું મૌન મારી ભીતરે,

જાતનો વનવાસ દોર્યો ને લખ્યું કે ‘તું નથી’.

shunytano ras doryo ne lakhyun ke ‘tun nathi’