રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ધીમે ગતિ પકડતો, પંખો ફરી રહ્યો છે
dhime gati pakaDto, pankho phari rahyo chhe
જાતુષ જોશી
જાતુષ જોશી
ધીમે ગતિ પકડતો, પંખો ફરી રહ્યો છે,
રોજે પવનને નડતો, પંખો ફરી રહ્યો છે.
પંખાના ભાગ્યમાં બસ ત્રણ પાંખિયાં લખાયાં,
લઈ પાંખિયાં લટકતો, પંખો ફરી રહ્યો છે.
આ શહેરમાં નિરંતર ફરતું રહે બધું પણ,
પંખો કદી ન ફરતો, પંખો ફરી રહ્યો છે.
ક્યારેક થાક લાગે તો પણ કરી શકે શું?
‘ખટ્ ખટ્’ કશું બબડતો, પંખો ફરી રહ્યો છે.
પંખા વિષે વધારે ઇતિહાસ કૈં કહે ના,
ઉલ્લેખ છે અછડતો : ‘પંખો ફરી રહ્યો છે’
સ્રોત
- પુસ્તક : પશ્યંતીની પેલે પાર (પૃષ્ઠ ક્રમાંક 30)
- સર્જક : જાતુષ જોશી
- પ્રકાશક : પાર્શ્વ પબ્લિકેશન
- વર્ષ : 2011