શબ્દ નૈં સંકેત નૈં જે પૂછવું તે પૂછવું કઈ રીતથી?

શબ્દ નૈં સંકેત નૈં જે પૂછવું તે પૂછવું કઈ રીતથી?

આંસુ જે ક્યારેય પણ આવ્યું જ નૈં તે લૂછવું કઈ રીતથી?

તું કહે છે સાવ ભૂલી જા મને ને હું ય કોશિશ તો કરું,

જળ વડે પથ્થર ઉપરનું કોતરેલું ભૂંસવું કઈ રીતથી?

તું પ્રથમ અમને હવામાં નામ લખવાનું કહે એ શક્ય છે?

ને ઉપરથી ઘૂંટવાનું પણ કહે તો ઘૂંટવું કઈ રીતથી?

હાથ લંબાવ્યો અને ભોંઠો પડ્યો ને ડાળ પણ શરમાઈ ગઈ,

આ ખરેલા ફૂલને જો ચૂંટવું તો ચૂંટવું કઈ રીતથી?

હું હવે સંપૂર્ણ તારો થઈ ગયો છું, હું હવેથી હું નથી,

પ્રશ્ન એ છે કે મને મારી કનેથી ઝૂંટવું કઈ રીતથી?

shabd nain sanket nain je puchhawun te puchhawun kai ritthi?