રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો

રજિસ્ટ્રેશન કરો

શબ્દ નૈં સંકેત નૈં જે પૂછવું તે પૂછવું કઈ રીતથી?

અનિલ ચાવડા

શબ્દ નૈં સંકેત નૈં જે પૂછવું તે પૂછવું કઈ રીતથી?

અનિલ ચાવડા

Roman

શબ્દ નૈં સંકેત નૈં જે પૂછવું તે પૂછવું કઈ રીતથી?

આંસુ જે ક્યારેય પણ આવ્યું જ નૈં તે લૂછવું કઈ રીતથી?

તું કહે છે સાવ ભૂલી જા મને ને હું ય કોશિશ તો કરું,

જળ વડે પથ્થર ઉપરનું કોતરેલું ભૂંસવું કઈ રીતથી?

તું પ્રથમ અમને હવામાં નામ લખવાનું કહે એ શક્ય છે?

ને ઉપરથી ઘૂંટવાનું પણ કહે તો ઘૂંટવું કઈ રીતથી?

હાથ લંબાવ્યો અને ભોંઠો પડ્યો ને ડાળ પણ શરમાઈ ગઈ,

આ ખરેલા ફૂલને જો ચૂંટવું તો ચૂંટવું કઈ રીતથી?

હું હવે સંપૂર્ણ તારો થઈ ગયો છું, હું હવેથી હું નથી,

પ્રશ્ન એ છે કે મને મારી કનેથી ઝૂંટવું કઈ રીતથી?

સ્રોત

પુસ્તક : સવાર લઈને (પૃષ્ઠ ક્રમાંક 54)
સર્જક : અનિલ ચાવડા
પ્રકાશક : નવભારત સાહિત્ય મંદિર
વર્ષ : 2012