સૌ પ્રથમ તો ક્યાં જવું છે? એટલું નક્કી કરો

સૌ પ્રથમ તો ક્યાં જવું છે, એટલું નક્કી કરો,

બસ, પછી નક્કી કર્યું છે, એટલું નક્કી કરો.

આમ તો બેઠા રહીએ તોય ચાલે જિંદગી,

ક્યાં સુધી આ બેસવું છે, એટલું નક્કી કરો?

કોઈની નજદીક આવ્યાં છો; પરંતુ આટલાં?

તાપવું કે દાઝવું છે, એટલું નક્કી કરો.

આપ-લે હૈયાંની છે; પણ એમની બે આંખમાં,

કાળજું કે ત્રાજવું છે, એટલું નક્કી કરો.

રોજ વધતી વય શરીરી ધર્મ છે મંજૂર પણ,

મોટા કે ઘરડા થવું છે, એટલું નક્કી કરો.

હર જનમમાં કોણ બીજું આપણી અંદર રહે?

આ વખત એ જાણવું છે, એટલું નક્કી કરો.

છે તરાપો, છે હલેસાં, ને ભરોસો છે, છતાં;

જળમાં પાણી કેટલું છે, એટલું નક્કી કરો.

sau pratham to kyan jawun chhe? etalun nakki karo