આમ જુઓ તો માણસનું મન જાનીવાલીપીનાલા,

આમ જુઓ તો આખું જીવન જાનીવાલીપીનાલા.

વાદળ, વૃક્ષો, પંખી, કીટક ને રંગબેરંગી દુનિયા,

રંગબેરંગી સઘળાં સર્જન જાનીવાલીપીનાલા.

એ જોવાની ઘટના ક્યાં છે! તોપણ રંગો દેખાશે,

ધડકન-બડકન, સ્પંદન-બંદન જાનીવાલીપીનાલા.

આમ જુઓ તો રાધા ગોરી, આમ કનૈયો કાળો, પણ :

સાથે હો જ્યાં રાધા-મોહન જાનીવાલીપીનાલા.

બાગ-બગીચા, ફૂલો , ગજરા ને બારીના પડદાઓ;

એક 'પવન'નાં વિધવિધ વાહન જાનીવાલીપીનાલા.