સાંજ પડતા સાંભરે તે અવસરોના સમ તને

સાંજ પડતા સાંભરે તે અવસરોના સમ તને

આવ પાછી, આપણી આ ઉંમરોના સમ તને.

ઉંમરો અટકી પડી છે ત્યાં જ પાછી આવજે

વય વગર નાહક વધેલાં અંતરોના સમ તને.

આવ તું પલળી જવા આ મનભરી લીલાશમાં

શાંત શીતળ આગ ઝરતી ઝરમરોના સમ તને.

અષ્ટમીની ચાંદનીમાં કર ફરી એવાં મિલન

જોઈને ડોલી જશે તે ડુંગરોના સમ તને.

પાડ સાચા તેં કરેલા વાયદા ‘આકાશ’ને

શબ્દથી છૂટા પડેલા અક્ષરોના સમ તને.

sanj paDta sambhre te awasrona sam tane