મળ્યું છે લાગણીનું નોખું જે સરવર

મળ્યું છે લાગણીનું નોખું જે સરવર, ત્યજી દઈએ?

અમે સિદ્ધાર્થ ક્યાં છીએ કે, એવું ઘર ત્યજી દઈએ!

ઘણાને દઈને હડસેલો તમે ઊંચે ગયા છો, દોસ્ત,

અમે તમને ઝૂકીને શું અમારું સ્તર ત્યજી દઈએ?

સુરક્ષા કરવી હો સંબંધની તો એ જરૂરી છે,

કરે જે જખ્મી, એવા શબ્દનું ખંજર ત્યજી દઈએ.

શું મેળવશો આ નફરત, વેર કે ધિક્કાર રાખીને?

ચલો, મનમાં પડેલા એ બધા પથ્થર ત્યજી દઈએ.

તમે સમજો તો બહુ આસાન છે મળવાનું બન્નેનું,

પડ્યું છે બે હૃદય વચ્ચે ઘણું અંતર, ત્યજી દઈએ.

સુકાની થઈને તો આવો અમારા વ્હાણ પર ક્યારેક,

અમે જે ક્યારના પકડી ઊભા લંગર, ત્યજી દઈએ.

malyun chhe lagNinun nokhun sarovar