સમયનો સૂર્ય આથમતો ગયો તેથી સ્મરણ ઝાંખા થયા.

અને હું ઘર તરફ વળતો ગયો તેથી સ્મરણ ઝાંખા થયા.

જતી વેળા ન તો તેં સાદ પાડ્યો કે ન હું બોલી શક્યો,

દિવાલો મૌનની ચણતો ગયો તેથી સ્મરણ ઝાંખા થયા.

કશુ ખોવાય છે ત્યારે જ કૈં મળતું હશે એવું બધું,

મનોમન ક્યાંક હું ગણતો ગયો તેથી સ્મરણ ઝાંખા થયા.

કશે એના વિશે ચર્ચા કરી લેવા મળે તો પણ ઘણું,

બધાને એ રીતે મળતો ગયો તેથી સ્મરણ ઝાંખા થયા.

વિતેલા એ સમયને 'તખ્ત' પાછો લાવવાની જીદમાં,

પ્રસંગો ખાસ અવગણતો ગયો તેથી સ્મરણ ઝાંખા થયા.