સામા મળ્યાં તો એમની નજરો ઢળી ગઈ

સામા મળ્યાં તો એમની નજરો ઢળી ગઈ,

રસ્તા મહીં જ આજ તો મંજિલ મળી ગઈ.

સાચે જ મીણ જેવી હતી મારી જિંદગી,

દુખનો જરાક તાપ પડ્યો, ઓગળી ગઈ.

મારાથી તો એ આંસુ વધુ ખુશનસીબ છે,

જેને તમારી આંખમાં જગ્યા મળી ગઈ.

કહેતી ફરે છે બાગમાં એકેક ફૂલને,

તુજ આગમનની વાત હવા સાંભળી ગઈ.

મન કલ્પનામાં ચૌદે ભુવન ઘૂમતું રહ્યું,

દૃષ્ટિ ક્ષિતિજ સુધી ગઈ પાછી વળી ગઈ.

‘આદિલ’ ઘરેથી નીકળ્યો મિત્રોને શોધવા,

ઓ દુશ્મની, તું રાહમાં ક્યાંથી મળી ગઈ.

sama malyan to emni najro Dhali gai