રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
સાજન
sajan
રાજેન્દ્ર શુક્લ
રાજેન્દ્ર શુક્લ
દૂર દૂર પરહરતાં સાજન
વરસો આમ જ સરતાં, સાજન.
કારતકના કોડીલા દિવસો –
ઊગી આથમી ખરતા, સાજન!
માગશરના માઝમ મ્હોલોમાં
નેવાં ઝરમર ઝરતાં, સાજન!
પોષ શિશિરની રજાઈ ઓઢી
અમે એક થરથરતા, સાજન!
માઘવધાવ્યા પંચમ સ્વર તો
કાન વિષે કરકરતા, સાજન!
છાકભર્યા ફાગણના દ્હાડા-
હોશ અમારા હરતા, સાજન!
ચૈત્ર ચાંદની, લ્હાય બળે છે,
તમે જ ચંદન ધરતાં, સાજન!
એ વૈશાખી ગોરજવેળા,
ફરી ફરીને સ્મરતા. સાજન!
જેઠ મહિને વટપૂજન વ્રત
લોક જાગરણ કરતાં, સાજન!
આષાઢી અંધારે મનમાં
વીજ સમાં તરવરતાં, સાજન.
શ્રાવણનાં સરવરની પાળે,
હવે એકલા ફરતા, સાજન!
ભાદરવો ભરપૂર વહે છે,
કાગ નિસાસા ભરતા. સાજન!
આસોનાં આંગણ સંભારે
પગલાં કુંકુમઝરતાં, સાજન!
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 298)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004