રેખ્તા
હિન્દવી
સૂફીનામા
રાજસ્થાની
જ્યાં તૂટ્યાં ચપ્પલ સફર સમજાઈ ગઈ
jyaan tutyaan chappal safar samajai gai
દિલીપ શ્રીમાળી
દિલીપ શ્રીમાળી
જ્યાં તૂટ્યાં ચપ્પલ સફર સમજાઈ ગઈ,
જિંદગીની ચડઉતર સમજાઈ ગઈ.
સૂર્યનાં જ્યાં કિરણો સીધાં પડ્યાં,
ત્યાં જ તડકાની અસર સમજાઈ ગઈ.
ચીસ પાડીને ખર્યું જ્યાં પાંદડું,
વૃક્ષને પણ પાનખર સમજાઈ ગઈ.
વાત પથ્થર પર લખી સમજાઈ નહિ,
ફક્ત એના સ્મિત પર સમજાઈ ગઈ.
ઘર નહીં, મારી કબર બંધાય છે,
પથ્થરોની કરકસર સમજાઈ ગઈ.
સ્રોત
- પુસ્તક : કવિ તરફથી મળેલી કૃતિ