રેખ્તા
હિન્દવી
સૂફીનામા
રાજસ્થાની
અમે જે કલ્પી હતી એવી જિંદગી ન મળી,
બધી જગાએ આ દુનિયામાં લાગણી ન મળી.
એ ઘરની વાત જવા દો, એ ઘર મળે ક્યાંથી?
કે જેની શોધ હતી એ મને ગલી ન મળી!
કરી ગયા અમે રસ્તો પસાર અંધારે,
જરૂર અમને પડી ત્યારે રોશની ન મળી.
ખીલી ઊઠે છે તો થઈ છે એ આકર્ષક,
અહીં તો સાદી કળીમાંય સાદગી ન મળી.
જીવન તો પ્રેમમાં પૂરું થઈ ગયું, ‘નૂરી’!
અને આ આંખ પરસ્પર હજુ લગી ન મળી!
સ્રોત
- પુસ્તક : મધુવન (પૃષ્ઠ ક્રમાંક 144)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4