છે ફક્ત રિસામણું ઝઘડો નથી

છે ફક્ત રિસામણું ઝઘડો નથી

આ ગઝલ ડૂસકું જ છે ઠૂઠવો નથી

કોઈ બાળક થાય રાજી જોઈને

એટલો ભોળો કોઈ ચહેરો નથી

પાવા ક્યાં વાગે છે મારા શ્વાસમાં

તારી આંખોમાં હવે મેળો નથી

તળિયાઝાટક છે ઉમંગો એમના

ને અમારો હર્ષ તો માતો નથી

હસતાંહસતાં એને પી નાખો હવે

ઘૂંટડો કંઈ એટલો કડવો નથી

ચોરપગલે પંડમાં પાછા વળો

એ વગર બીજો કોઈ રસ્તો નથી

કોઈ મુશ્કેટાટ બાંધે છે મને

આ ગઝલ લખ્યા વગર છૂટકો નથી

કહેવા સુણવાનો જ લ્હાવો છે અદમ

શબ્દ કેવળ શબ્દ છે દાવો નથી

chhe phakt risamanun jhaghDo nathi