ટૂંકા રસ્તે દોડાદોડી શું કરવાની

ટૂંકા રસ્તે દોડાદોડી શું કરવાની!

ચાર દિવસ છે, એમાં હોળી શું કરવાની!

આવે તો પોંખી લો એજ પળે શબ્દોને,

ના આવે તો ટીંગાટોળી શું કરવાની!

સામે ક્યાંક મળે તો ઠપકો દઈ દેવાનો,

મંદિર જઈને જીભાજોડી શું કરવાની!

જે આવે નૈ છંદોલયનું ઓઢણ ઓઢી,

લાખ ભલે હો ગોરીગોરી, શું કરવાની!

પીડા છે? લાવો, લાવો, પણ એક અરજ છે!

‘અઢળક દેજો, થોડી થોડી શું કરવાની!’

tunkaa raste dodaadodii shun karvaanii