રેખ્તા
હિન્દવી
સૂફીનામા
રાજસ્થાની
પ્રેમનો દરિયો તરવાને
premno dariyo tarvaane
તૌફિક 'પ્રીતમ'
તૌફિક 'પ્રીતમ'
કારણ કોઈ તો હોય છે, મિત્રો! કાર્ય જગતમાં કરવાને!
અમને ગઝલની ભૂમિ ગમી છે, દર્દ-છબી ચીતરવાને!
હીરાકણી હીરા કાપે છે, સોમલ ઝેરનું મારણ છે;
તારી યાદ ગઝલમાં વણું છું, તારી યાદ વીસ૨વાને!
મારા મન-મંદિરની દેવી! અશ્રુ-કમળ સ્વીકાર કરો;
નયન સરોવરથી લાવ્યો છું, આપનાં ચરણે ધરવાને!
બાહુ-બળની વાત ન કરજે, મનની શક્તિ જોઈએ છે;
પ્રેમને દરિયે હે પડનારા! પ્રેમનો દરિયો તરવાને!
વિરહની રાતે આભના તારા, ગણનારા જરા નૈનમાં જો,
કેટલા તારા ચળકી રહ્યા છે, એ આકાશે ખરવાને!
શ્રાવણ-ભાદરવા કેરી, હે રાહ નીરખનારા વાદળ!
ઋતુ મારા નૈનનની ગમી છે, એ શ્રાવણ-ભાદરવાને!
જઈને કોઈ તો લઈ આવો, પેલી ક્ષિતિજને પાર હશે,
કેટલી ઘડીઓ વીતી ગઈ છે, આભથી ચંદ્ર ઊતરવાને!
સ્રોત
- પુસ્તક : મધુવન (પૃષ્ઠ ક્રમાંક 115)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન
- વર્ષ : 2002
- આવૃત્તિ : ચોથી આવૃત્તિ