રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
ઝંખના-બસસ્ટોપ પર
jhankhna basastop par
હર્ષદેવ માધવ
હર્ષદેવ માધવ
એક સપનું આવશે ને એય છાનું આવશે
જેમાં કારણ ચાહવા માટે સજાનું આવશે.
ઝાંઝવાં ફંફોસવા પાંપણ ઉઘાડી શોધતાં
આંખમાં આંસુનું છૂપું ચોરખાનું આવશે.
પૂર્વજન્મોની કથાના તાંતણા સાંધો હજુ
ત્યાં અધૂરું જિંદગીનું કોઈ પાનું આવશે.
નામ તો મારું લખેલું બારણાં ઉપર હશે
ઘર ખરું જોવા જશો તો ત્યાં વ્યથાનું આવશે.
ઝંખના – બસસ્ટોપ પર, છેડે પ્રતીક્ષા-માર્ગના
ત્યાં જઈને પણ તને શોધ્યા જવાનું આવશે
આપણે ભીંજાઈ જાવાનું વિચાર્યું ત્યાં ફરી
ઝાપટું વરસી ગયાનું એક બ્હાનું આવશે...
સ્રોત
- પુસ્તક : પાન સરનામું ન જાણે ઝાડનું આ દેશમાં (પૃષ્ઠ ક્રમાંક 9)
- સર્જક : ડૉ. હર્ષદેવ માધવ
- પ્રકાશક : પાર્શ્વ પબ્લિકેશન