રેખ્તા
હિન્દવી
સૂફીનામા
રાજસ્થાની
ગઝલ તો ગઝલ છે!
ghazal to ghazal chhe!
જિત ચુડાસમા
જિત ચુડાસમા
વખોડો, વખાણો, પ્રમાણો, પ્રસારો, ગઝલ તો ગઝલ છે!
પ્રથમ આંખો ઉપરથી ચશ્મા ઉતારો, ગઝલ તો ગઝલ છે!
પીડાને ય ઘૂંટીને ચંદન બનાવે ને આંસુને અગ્નિ;
શરત એટલી કે પ્રથમ હો ઇશારો, ગઝલ તો ગઝલ છે!
હથેળીમાં લોબાન સળગાવી કરવી પડે છે પ્રતીક્ષા;
નથી કાંઈ બે-ચાર પળનો ધખારો, ગઝલ તો ગઝલ છે!
ન અંદર કશું હો ન બ્હારે, બધે શૂન્યતા હોય કેવળ;
અચાનક એ લઈને ઊઠે એકતારો, ગઝલ તો ગઝલ છે!
મળો, બાથમાં લો, ભીંસો; એય પાછા વિવેચક બનીને?
તમારી આ મળવાની આદત સુધારો, ગઝલ તો ગઝલ છે!
સભા તો સભા છે, ચડાવી દે માથે ને નીચે ય પાડે;
બધું એક ખૂણામાં જઈને ઉતારો, ગઝલ તો ગઝલ છે!
સ્રોત
- પુસ્તક : કવિ તરફથી મળેલી કૃતિ