રેખ્તા
હિન્દવી
સૂફીનામા
રાજસ્થાની
વરસતી વાદળી આપો
warasti wadli aapo
સાકિન કેશવાણી
સાકિન કેશવાણી
રહી પડદામાં દર્શનની ઝલક થોડીઘણી આપો,
ન આપો ચંદ્ર મારા હાથમાં, પણ ચાંદની આપો.
પ્રતીક્ષાને બહાને જિંદગી જિવાઈ તો જાશે,
તમારા આગમનની કંઈ ખબર ખોટી-ખરી આપો.
તમારી યાદની ઉષ્મા મળે તોપણ ગનીમત છે,
ન તરણાંઓના ભોગે હૂંફ લેવા તાપણી આપો.
સિતારી ના ધરો મુજ હાથને બંધનમાં રાખીને,
જો મારા હોઠ સીવો તો ન મુજને બંસરી આપો.
ફૂલો ખિલાવવાના હૈયે એ પણ કોડ રાખે છે,
મરુભૂમિને માટે પણ વરસતી વાદળી આપો.
વધુ બે શ્વાસ લેવાનું પ્રલોભન પ્રાણને આપું,
મને એવી મિલન-આશા તણી સંજીવની આપો.
ઉષાની એકધારી રમ્યતા જોવી નથી ગમતી,
કે આંખોને નીરખવા કોઈ સૂરત સાંવરી આપો.
નથી મારે જીવન પર રાખવા ઉપકાર કોઈના,
કિરણ પાછાં ધરી દઉં સૂર્યને એ આરસી આપો!
હું કોઈની અદાવત ફેરવી નાખું મહોબ્બતમાં,
તમે 'સાકિન'ને એવો પ્રેમનો પારસમણિ આપો.
સ્રોત
- પુસ્તક : મધુવન (પૃષ્ઠ ક્રમાંક 240)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4