પૂછ એને કે જે શતાયુ છે

પૂછ એને કે જે શતાયુ છે;

કેટલું-ક્યારે-ક્યાં જિવાયું છે.

શ્રી ૧ા બારણે લખ્યા કર તું,

શબ્દથી બીજું શું સવાયું છે.

આંખમાં કીકી જેમ તું સાચવ,

આંસુ ક્યાં દોસ્ત ઓરમાયું છે.

સત્યને કોણ ધારે જોયા કર,

કાં સુદર્શન છે, કાં અડાયું છે.

આપણો દેશ છે દશાનનનો,

આપણો માંહ્યલો જટાયુ છે.

કોઈનું ક્યાં થયું તે તારું થાય,

શાહીનું ટીપું તો પરાયું છે.

તારે કાજે ગઝલ મનોરંજન,

મારે માટે તો પ્રાણવાયુ છે.

poochh ene ke je shatayu chhe