કાચના મ્હેલોમાં કાગારોળ છે

કાચના મ્હેલોમાં કાગારોળ છે,

પથ્થરોની આંખ પણ તરબોળ છે.

કલ્પના સુંદર હતી, રૂડી હતી,

વાસ્તવિકતા કેટલી બેડોળ છે!

રાતદિ’ ચાલું છું ત્યાંનો ત્યાં જ છું,

મારું જીવન જાણે કે ચકડોળ છે.

મારા દિલમાં જીવતી ચિન્ગારીઓ,

એની આંખોમાં નર્યો વંટોળ છે.

કોણ એનું રૂપ બદલે શી મજાલ?

આ તો મારા ગામની ભૂગોળ છે!

ઘાણીએ ફરતો બળદ અટકી જશે,

એને ના ક્હેશો કે પૃથ્વી ગોળ છે.

kaachnaa mhelomaan kaagaarol chhe