એક માણસ હારવાનો વારતાના અંતમાં

એક માણસ હારવાનો વારતાના અંતમાં,

હું દિલાસો આપવાનો વારતાના અંતમાં.

સોળ આના સાવ સાચી વાત લઈને આવજો,

હું પુરાવા માગવાનો વારતાના અંતમાં.

પાનખરની કેટલી થઈ છે અસર એ શોધવા,

ડાળ લીલી કાપવાનો વારતાના અંતમાં.

હું તમારી જીતનો હિમાયતી છું એટલે,

સાથ કાયમ આપવાનો વારતાના અંતમાં.

કોણ મારા શ્વાસનો હકદાર છે એ જાણવા,

રાત આખી જાગવાનો વારતાના અંતમાં.

જિંદગીભર આપતા આવ્યાં છો જાકારો ભલે,

હું તમારો લાગવાનો વારતાના અંતમાં.

ek manas harwano wartana antman