રેખ્તા
હિન્દવી
સૂફીનામા
રાજસ્થાની
પહેરણ ફકીરનું
paheran phakiranun
બાપુભાઈ ગઢવી
બાપુભાઈ ગઢવી
મનનુંય શું કરું, હું કરું શું શરીરનું?
ક્યાં જઈ શકે ખસીને કશે વૃક્ષ તીરનું?
એવા જ ગુના મેંય કર્યા છે કબૂલ, હા
મારુંય ભલે થાય, થયું જે કબીરનું!
ટીપેટીપું નીચોવીને તારી ગઝલ લખી,
આથી વધુ શું થાય બીજુ કંઈ રુધિરનું?
આ વાત, વેણ, શબ્દનો શો અર્થ નીકળ્યો?
ગૂંગાનું ગાવણું અને સૂણવું બધિરનું!
રહેવા દે બાપુભાઈ, તું સમજી નહિં શકે,
મેલું શું કામ હોય છે પહેરણ ફકીરનું?
સ્રોત
- પુસ્તક : ગુજરાતી કવિતાચયન 1991 (પૃષ્ઠ ક્રમાંક 42)
- સંપાદક : હર્ષદ ત્રિવેદી
- પ્રકાશક : ગુજરાતી સાહિત્ય પરિષદ
- વર્ષ : 1992