જુઓ અજવાળું ફેલાઈ રહ્યું છે

જુઓ અજવાળું ફેલાઈ રહ્યું છે

જુઓ અંધારું શરમાઈ રહ્યું છે

જુઓ ચમકી રહ્યો છે એક તારો

મળસ્કું જાણે મલકાઈ રહ્યું છે

હજીયે શોધ ચાલે છે કોઈની

હજીયે કોઈ સંતાઈ રહ્યું છે

ધપે છે એક પડછાયો ક્ષિતિજ પર

જગત પાછળ ધકેલાઈ રહ્યું છે

ગગનના આવરણ પાછળથી જાણે

કોઈનું રૂપ છલકાઈ રહ્યું છે

તમે બેસી રહ્યા છો દ્વાર ભીડી

ગલીમાં લોહી રેડાઈ રહ્યું છે

તમે અટકાવ્યું જેને હોઠ પાછળ

હવે હાથોથી કહેવાઈ રહ્યું છે

તમે શબ્દોથી જેને દૂર રાખ્યું

હવે આંખોથી છલકાઈ રહ્યું છે

તમે તળિયે મૂકી આવ્યા’તા જેને

એ પરપોટામાં ડોકાઈ રહ્યું છે

તમે જેને શિખરનું મૌન સમજ્યા

તળેટીમાં તે પડઘાઈ રહ્યું છે

તમે સૂરજનો રથ રોક્યો હતો પણ

જુઓ અજવાળું ફેલાઈ રહ્યું છે

તમે ગુમ થૈ ગયા ક્યાં પાછા આદિલ

તમારું નામ બોલાઈ રહ્યું છે

juo ajwalun phelai rahyun chhe