રેખ્તા
હિન્દવી
સૂફીનામા
રાજસ્થાની
નામ
nam
ભગવતીકુમાર શર્મા
ભગવતીકુમાર શર્મા
છાતીનાં છૂંદણાંમાં જે ત્રોફાવવાનું નામ,
લોહીની રંગ ઝાયમાં એ શોધવાનું નામ.
મોસમ અહીં તો કોઈ પણ છલનાની હોય છે,
શ્રાવણ-અષાઢ રાખીએ આ ઝાંઝવાનું નામ.
પગરવ, દિશાઓ, માર્ગ વચન-કાંઈ પણ નથી,
તારી પ્રતીક્ષા-આંખને શણગારવાનું નામ.
સ્પર્શી તને વહે છે જે એની અલગ છે વાત,
હોતું નથી જ શ્વાસ બધીયે હવાનું નામ.
શી જાણ : એમાં કેટલી ડૂબશે ઉદાસ સાંજ
ઊગ્યો છે સૂર્ય લઈને સજળ નેજવાનું નામ.
મૂંગો બની ફરું છું હું ટહુકાના દેશમાં,
કેવું વિકટ છે કોઈનું ઉચ્ચારવાનું નામ!
ફરક્યાં’તાં સ્પર્શનાં અહીં કોમળ પતંગિયાં,
ફૂલોના હોઠ પર છે હજી ટેરવાનું નામ.
સ્રોત
- પુસ્તક : વયઃસંધિ (પૃષ્ઠ ક્રમાંક 67)
- સંપાદક : બાપુભાઈ ગઢવી
- પ્રકાશક : ગૂર્જર ગ્રંથરત્ન કાર્યાલય
- વર્ષ : 2002