ના દુહામાં કે તને હું વારતામાં નહિ મળું

ના દુહામાં કે તને હું વારતામાં નહિ મળું,

હું અલગ છું દોસ્ત સહુથી હું બધામાં નહિ મળું.

બંધ આંખે સ્વપ્નમાં કે કલ્પનામાં નહિ મળું,

એક વેળા ના કહી તો હું કશામાં નહિ મળું.

સાવ પાણીના પ્રતિબિંબોમાં શાયદ હું મળું,

પણ હવે આ તડ પડેલા આયનામાં નહિ મળું.

હું ગઝલિયત છું, ગઝલ મારા વગર તો છે જ ક્યાં?

હું તને આ ગાલગાગા-ગાલગામાં નહિ મળું.

ઠામ-ઠેકાણું અગર નિશ્ચિત થશે ‘નીરવ’ કદી,

તો પછી જનમોજનમની આવ-જામાં નહિ મળું.

na duhaman ke tane hun wartaman nahi malun