રેખ્તા
હિન્દવી
સૂફીનામા
રાજસ્થાની
આગમન જેવું
agaman jewun
સૈફ પાલનપુરી
સૈફ પાલનપુરી
કદી વસ્તીભર્યું લાગ્યું કદી વેરાન વન જેવું,
જવાનીમાં જીવન પર થઈ શક્યું ક્યાં કંઈ મનન જેવું!
સૂરજ ઊગ્યો છે લાવો, થોડી શબનમ હુંય વરસાવું,
તમારી યાદ રૂપે છે હૃદયમાં કંઈ સુમન જેવું.
કોઈ જો સ્હેજ છેડે છે તો એ શરમાઈ જાયે છે,
તમે દિલમાં વસ્યા છો તો થયું છે દિલ દુલ્હન જેવું.
તમે રિસાતે ના તો પાનખરનો ક્રમ ન જળવાતે,
અમારી ભૂલ કે દિલને સજાવ્યું'તું ચમન જેવું.
હવે તો 'સૈફ' ઇચ્છા છે કે મૃત્યુ દ્વાર ખખડાવે,
ઘડીભર તો મને લાગે કોઈના આગમન જેવું.
સ્રોત
- પુસ્તક : મધુવન (પૃષ્ઠ ક્રમાંક 254)
- સંપાદક : હરીન્દ્ર દવે
- પ્રકાશક : પ્રવીણ પ્રકાશન, રાજકોટ
- વર્ષ : 2002
- આવૃત્તિ : 4