રેખ્તા
હિન્દવી
સૂફીનામા
રાજસ્થાની
આગવી ગઝલ
aagvi gazal
શાદ જામનગરી
શાદ જામનગરી
રોકાઈ જા હે મિત્ર! હું સર્જું નવી ગઝલ,
બિરદાવે જેને લોક, કહી અવનવી ગઝલ.
સીંચી હૃદયનું રક્ત ને ચિંતન મનન થકી,
તારી ખુશીને કાજ રચું આગવી ગઝલ.
એવો ચિતાર તારો હું કંડારવા મથું,
જેથી ભરમ ખુલે ને કહે માનવી ગઝલ.
બન્ને જહાંના ભેદ છુપાયાં છે નૈનમાં,
તુજ પાંપણોને એટલે મેં વર્ણવી ગઝલ.
દરકાર તેને અન્યની રહેતી નથી પછી,
તારા પ્રણયની જેને હો આલાપવી ગઝલ.
તુજથી જ પ્રેરણા લઈ મુજ ભાવના સભર,
છે તુજ હજુરમા જ હવે અર્પવી ગઝલ.
બંધ આંખડીમાં ‘શાદ’ કર્યાં કેદ તેમને,
આસાન એમ ક્યાં હતી આલેખવી ગઝલ.
સ્રોત
- પુસ્તક : રેશમી પાલવ (પૃષ્ઠ ક્રમાંક 1)
- સર્જક : શાદ જામનગરી
- પ્રકાશક : આરાધના પ્રકાશન
- વર્ષ : 1972