અઘરી વાત છે

અઘરી વાત છે

રોજ મનને વારવું એ છેક અઘરી વાત છે

કોઈના શરણ જવું એ છેક અઘરી વાત છે

કોઈના ખભે ચઢીને એટલું જોઈ શક્યા

વેંત છેટું ભાળવું એ છેક અઘરી વાત છે

આ ચરણનું મૂળ તો પાતાળ લગ પૂગી ગયું

મૂળને ઉચ્છેદવું એ છેક અઘરી વાત છે

ચાંચ હો તો ચણ ન હો ને પાંખ હો તો નભ ન હો

તોય પંખી પાળવું એ છેક અઘરી વાત છે

આંખ દાબી કોઈ વર્ષો બાદ પૂછે કોણ છું?

નામ ત્યારે ધારવું છેક અઘરી વાત છે

આ નદીમાં આંખના બે દીવડા તરતા મૂકી

આંસુને સંતાડવું એ છેક અઘરી વાત છે

aghri wat chhe