મારી કને તો ફક્ત આ મારું શરીર છે

મારી કને તો ફક્ત આ મારું શરીર છે,

મારા બધાયે શ્વાસ તો જાણે ફકીર છે.

ખાલી અમારી બ્હારની હાલતને ના જુઓ,

મારી ભીતરનો આદમી કેવો અમીર છે!

એમાંય પણ દેખાય છે સૃષ્ટિ આખીય તે,

આખું ભલે ન હોય ફળ, એકાદ ચીર છે.

છે કોણ કે બેસી રહ્યું છે રોકી શ્વાસને,

ખળ ખળ નદીનું વ્હેણ જોને કેવું સ્થિર છે!

એમાં જ હું વણતો રહું છું રંગ સૃષ્ટિના,

મારી ગઝલના પોતમાં મારો કબીર છે.

કેવી મજાથી ઝબકી રહી છે વીજ આભમાં,

પોતે ખુદાના હાથની જાણે લકીર છે.

maarii kane to fakt aa maarun shariir chhe