ક્ષણોને તોડવા બેઠો અને ઘટના ઘણી નીકળી

પ્રતિબિંબો જરા છોલ્યા અને છળની અણી નીકળી

ગરજતાં વાદળો વરસ્યા નહીં સ્હેજે ધરા ઉપર

તપાસો આદરી તો એ ફકત બોદી ટણી નીકળી

અસર તારી હતી જબરી આ આખા ગામમાં, કારણ

ગલી હું કોઈ પણ પકડું એ તારા ઘર ભણી નીકળી

અમે સરનામુ શોધ્યું મૌનનું આખાયે મ્હોલ્લામાં

ખબર અંતે પડી, ભાષા જ એની ઘરધણી નીકળી

હતાં એ ક્યારના અસ્વસ્થ જ્યારે ધ્યાનમાં બેઠા

પછી ગાદી નીચેથી મોહમાયાની કણી નીકળી