તે પછી મીરાં થવાની વાત કર

રંગ સાથેના સંબંધો તોડ પહેલાં; તે પછી મીરાં થવાની વાત કર.

શ્વેત વસ્ત્રો સાથ નાતો જોડ પહેલાં; તે પછી મીરાં થવાની વાત કર.

એકતારા સાથમાં તલ્લીન થઈને, ઘુંઘરૂની ગૂંજ સાથે લીન થઈને;

તું હૃદયના તારને ઝંઝોડ પહેલાં; તે પછી મીરાં થવાની વાત કર.

પગ તળે મેવાડની તપતી ધરા છે, પંથ જે સામે છે સર્વે આકરા છે;

મ્હેલ ને મહોલાતને તરછોડ પહેલાં, તે પછી મીરાં થવાની વાત કર.

ઝેરનો પ્યાલો પચાવી જાણવાનો, ભક્તિના રસને નિભાવી જાણવાનો,

આ જગત-સુરાનો પ્યાલો તોડ પહેલાં, તે પછી મીરાં થવાની વાત કર.

કૃષ્ણ નામે નીરને બસ પી જવાનું, બસ; ફક્ત એના નશે બહેકી જવાનું,

શ્યામ-નામી ઝંખના લઈ દોડ પહેલાં, તે પછી મીરાં થવાની વાત કર.

te pachhi miran thawani wat kar