કોઈ કહે ગમે તે અલેખે નથી જતું

કોઈ કહે ગમે તે અલેખે નથી જતું,

એકેય કર્મ કોઈનું એળે નથી જતું.

એની જુબાની સત્યથી ખૂબ જ અલગ હતી,

બોલાએલું ગળેથી કલેજે નથી જતું.

ખાબોચિયું નયનનું છે નોખા પ્રકારનું,

ખાલી નથી થતું કે ઉલેચે નથી જતું.

કોઈ સહન કર્યા જ કરે તોય કેટલું,

માથે દુઃખોનું ઝાડ ઉખેડે નથી જતું.

છે કાળનું વચન, ન કદીએ ટળી શકે,

ફરમાન મોતનું છે ધકેલે નથી જતું.

આંબો ઉતાવળે તો કદી પાકતો નથી,

ધીરજ વિનાનું કાર્ય સુપેરે નથી જતું.

ફેલાઈ જાય છે કદી અસ્તિત્વની સમું,

હોવું બલા સમાન સમેટે નથી જતું.

Koi Kahe Game Te Alekhe Nathi Jatu