મળવું હો તો આનાકાની નહિ કરવાની

મળવું હો તો આનાકાની નહિ કરવાની,

આમ મહોબત છાનીમાની નહિ કરવાની.

આગનું કારણ ચિનગારીને પૂછી આવો,

ખાલીખોટી વાત હવાની નહિ કરવાની.

તારી સુગંધ ખુદ આપી દેશે ઓળખ એની,

કોઈ રૂમાલે કોઈ નિશાની નહિ કરવાની.

ગઝલબઝલ તો ભલે લખો પણ મારી માફક,

આખી આ બરબાદ જવાની નહિ કરવાની.

જરૂર પડે તો ખલીલ, આ માથું દઈ દેવાનું,

મિત્રતામાં પાછી પાની નહિ કરવાની.

malawun ho to anakani nahi karwani