રેખ્તા
હિન્દવી
સૂફીનામા
રાજસ્થાની
ખાલી મ્યાન જેવું
khali myan jewun
અદમ ટંકારવી
અદમ ટંકારવી
સ્મરણ લીલું કપૂરી પાન જેવું
હવામાં ચોતરફ લોબાન જેવું
ઉરાડી છેક દરિયાપાર લઈ ગઈ
હસી એક છોકરી વિમાન જેવું
ઊઘાડી આંખ છે ને દૃશ્ય ગાયબ
સહજમાં થઈ ગયું છે ધ્યાન જેવું
ખબરઅંતર પૂછે ખૈરાત જાણે
કરે છે સ્મિત તે પણ દાન જેવું
હતું એ સ્વપ્નમાં રેશમ ને મલમલ
ને જાગી જોઉં તો કંતાન જેવું
અદમ, આ શ્વાસની ખીંટીએ લટકે
અમારું હોવું ખાલી મ્યાન જેવું
સ્રોત
- પુસ્તક : આપણી કવિતાસમૃદ્ધિ (ઉત્તરાર્ધ) (પૃષ્ઠ ક્રમાંક 369)
- સંપાદક : ચન્દ્રકાન્ત ટોપીવાળા
- પ્રકાશક : ગુજરાતી સાહિત્ય પરિષદ
- વર્ષ : 2004