રેખ્તા
હિન્દવી
સૂફીનામા
રાજસ્થાની
વ્યોમ વેચી વાંઝિયા વાદળી ખરીદે છે. ખબર છે?
લોહી બાળીને વરાળ જળ ખરીદે છે, ખબર છે?
રોજ પોતાનો તૂટેલો આયનો શણગારવા એ,
આંખ મૂકી ગીરવી કાજળ ખરીદે છે, ખબર છે?
પાનમાં થૂંકે લહુ ક્ષયગ્રસ્ત સડ્યાં ફેફસાંનું,
ચામડી વેચીને એ કાગળ ખરીદે છે, છે ખબર?
વસ્ત્રમાં નખશિખ કરી નાગીને શબ્દોમાં સજાવે,
કેવી કેવી રીત કેવું છળ ખરીદે છે, ખબર છે?
ખૂબ પાસેથી પિછાણે મર્દની મર્દાનગીને
કઈ દુકાનેથી એ કેવું બળ ખરીદે છે. ખબર છે?
છેક મોડી રાતના એક દાદરો નીચે ઊતરતો,
ને સડકથી પાઉં ને ઉસળ ખરીદે છે, ખબર છે?
સ્રોત
- પુસ્તક : દુંદુભિ (પૃષ્ઠ ક્રમાંક 49)
- સંપાદક : દલપત ચૌહાણ, હરીશ મંગલમ્, પ્રવીણ ગઢવી
- પ્રકાશક : રંગદ્વાર પ્રકાશન
- વર્ષ : 2001