કરી’તી આંસુની કેવી બચત! ન દેખાણી

કરી’તી આંસુની કેવી બચત! ન દેખાણી,

કોઈને તારી અસલ આવડત ન દેખાણી.

હું આંખ બંધ કરી જે સભર સભર જોતો

એ તારી આંખો મને આ વખત ન દેખાણી.

નજર પડે ને તરત કોઈ ખૂબી દેખાતી!

એ ફૂલ સામે મેં જોયું સતત, ન દેખાણી.

ખબર પડી ને રહ્યો આજીવન એ પસ્તાવો,

નથી એ હારનું દુઃખ પણ રમત ન દેખાણી.

નજર કે સ્પર્શ વડે થઈ જતી’તી છૂમંતર!

હતી તું ત્યાં સુધી ઘરમાં અછત ન દેખાણી.

પસંદ આવી ભીતર ગુંજતી જરીક જગા!

કરી’તી બ્હાર ઘણી માવજત, ન દેખાણી.

તળાવ, વાવ, કૂવા એટલે તો હોમાયાં

અસર નદીના કતલની તરત ન દેખાણી.

Kariti Ansuni Kevi Bachat! Na Dekhani