સામે નથી કોઈ અને શરમાઈ રહ્યો છું

સામે નથી કોઈ અને શરમાઈ રહ્યો છું

હું પોતે મને પોતાને દેખાઈ રહ્યો છું

આ મારો ખુલાસાઓથી ટેવાએલો ચેહરો

ચૂપ રહું છું તો લાગે છે કસમ ખાઈ રહ્યો છું

એક વાર મેં ફૂલો સમો દેખાવ કર્યો’તો

આ એની અસર છે કે હું કરમાઈ રહ્યો છું

ગઈ કાલે અમસ્તા જ હું થોડુંક હસ્યો’તો

આજે વિચાર આવતાં ગભરાઈ રહ્યો છું

તારા લીધે લોકો હવે નિરખે છે મને પણ

કાગળ છું હું કોરો અને વંચાઈ રહ્યો છું

મારા વિશે કોઈ હવે ચર્ચા નથી કરતું

આ કેવી સિફતથી હું વગોવાઈ રહ્યો છું

કહેવું છે ઘણું “સૈફ” અને કહી નથી શકતો

શબ્દોની છે દીવાલ ને દફનાઈ રહ્યો છું.

same nathi koi ane sharmai rahyo chhun