જો કોઈ મને પૂછે; તારું જીવન કાં બદલાઈ ગયું?

જો કોઈ મને પૂછે; તારું આ જીવન કાં બદલાઈ ગયું?

હું ટૂંકો ઉત્તર વાળું છું : ભોળું હૈયું લલચાઈ ગયું!

હરરોજ મુકદ્દર કરતું'તું બહુ મમતાથી સ્વાગત મારું.

જ્યાં ડગ દીધા ત્યાં કાંટાનું એક પાથરણું પથરાઈ ગયું.

હૈયામાં હોળી બળતી'તી, બે આંખ હંમેશાં ગળતી'તી,

ફાગણ-શ્રાવણની પૂનમનું એક સાથ પરવ ઉજવાઈ ગયું!

તેઓને હસતાં દેખીને ના રોઈ શકાયું મારાથી,

દુખિયા દિલને સંતોષ થયો : ટાણું તો સરસ સચવાઈ ગયું.

પૂછો વિદ્વતજનને પૂછો; શું અર્થ ફરી ગ્યા શબ્દોના?

આ ચાર દિવસનું ચાંદરણું કાં દી' ઊગતાં સંતાઈ ગયું?

નહીં તો આ પ્રણયની ગાથા તો એક નાની સરખી વાત હતી,

પણ બખિયા ભરવા બેઠો ત્યાં ઝીણું ઝીણું કંતાઈ ગયું.

જીવનની સફળતાનો છૂપો ઇતિહાસ તમે એને પૂછો-

એ શાખ જનાઝો પૂરે છે, આંસુથી કફન ભિંજાઈ ગયું.

ક્યારેક મિલનની મોજ-મઝા, ક્યારેક વિરહની લાખ વ્યથા,

લો બે જ શબદમાં જીવનનું પુસ્તક આખું વંચાઈ ગયું.

દિલહર આ મારું મૃત્યુ તો એક સીધી સાદી વાત હતી,

થાકેલ ઉતારું જાણે કે ઝોલું લેવા લંબાઈ ગયું!

jo koi mane puchhe; taru aa jivan kan badlai gayu?