જે આંસુ ખોઉં છું એનો મને અવેજ મળે

જે આંસુ ખોઉં છું એનો મને અવેજ મળે,

કે હું રડું તો તમારાં નયનમાં ભેજ મળે.

તમારી પ્રીત મળે, ને ફક્ત મને જ મળે;

પછી ભલેને વધારે નહીં, તો સ્હેજ મળે.

મળે છે સ્નેહના સાથી ઘણાય દુનિયામાં,

હૃદયને હઠ છે – પ્રથમ જે મળ્યાં’તાં એ જ મળે,

કહે છે એને બધા આંધળો મહોબ્બતમાં,

તમારા રૂપનું જેનાં નયનને તેજ મળે.

નસીબ એ જ કે વાગે વસંતમાં કાંટા,

ને પાનખર હો છતાંયે ફૂલોની સેજ મળે.

જો મળવું હોય તો ‘બેફામ’ની કબર પર જા,

હવે એ રખડુ નથી કે તને બધે જ મળે.

Je Aansu Khou Chhu Eno Mane Avej Male