હેઈસો! (દરિયાઈ ગઝલ)

હેઈસો! (દરિયાઈ ગઝલ)

દરિયામાં લુમ્બઝુમ્બ છે શેવાળ હેઈસો!

છેદાઈ ક્યાં છે મારી જનમનાળ હેઈસો!

કાંઠા ભલે ને હોય આ ખડકાળ હેઈસો!

મોજાંના મારથી થશે રેતાળ હેઈસો!

છીપલાંઓ, શંખ, માછલી, ડૂબેલ જહાજ, લાશ;

દરિયોય કેટલો છે બચરવાળ હેઈસો!

માણેકથંભ છોડીને માલમ કૂવાને થંભ;

ફીણાવી આવજાવ શી ઘટમાળ હેઈસો!

હેલ્લારો! વ્હાણ હું જ છું હેલ્લારો! દૂર દૂર...

કાંઠા ઉપરનો હું જ સ્થગિત કાળ હેઈસો!

ચીંધે છે દશ દિશાઓ દીવાદાંડી આંધળી;

દરિયાને શ્વાસ રાતદિવસ ફાળ હેઈસો!

છેલ્લું વહાણ છૂટવાની વેળા થઈ ગઈ;

માલમ, તું 'બેવડા'ને હવે બાળ હેઈસો!

heiso! (dariiyaaii gazal)