રેખ્તા ગુજરાતી ઉત્સવ - 5 જાન્યુઆરી: વડોદરા | 11 જાન્યુઆરી: મુંબઈ | 19 જાન્યુઆરી: ભાવનગર - ફ્રી રજિસ્ટ્રેશન કરો
રજિસ્ટ્રેશન કરો
રેખ્તા
હિન્દવી
સૂફીનામા
રાજસ્થાની
હતું
hatun
મનહરલાલ ચોક્સી
મનહરલાલ ચોક્સી
ધૂંધળા દીવા સમું આઘેથી દેખાતું હતું.
ને નિકટ જઈને નિહાળ્યું તો હૃદય બળતું હતું!
ચાર કેસૂડાંઓ તરફડતાં રહ્યાં વૈશાખમાં,
ને જગત આખુંય એના રંગથી રાતું હતું!
પાંચદશ ભીનાશવાળા શબ્દ બહેલાવી ગયા
લાગણીની શકયતાનું હોઠ પર કંકુ હતું.
ડાયરીનાં એકબે પાનાંઓ ખેાવાઈ ગયાં
એ જ પાના પર તમારું નામ-સરનામું હતું!
સ્પર્શની બારી ઉઘાડીને તરત ભાગી ગયું
ટેરવાં પર એક સ્પંદનનું હરણ બેઠું હતું.
ટોડલા પર પ્રેમનાં તોરણ સતત બાંધી ગયો
આમ તો જીવન આ મનહરનું બહુ સૂકું હતું.
સ્રોત
- પુસ્તક : કાવ્યસંચય - 3 (પૃષ્ઠ ક્રમાંક 100)
- સંપાદક : રમણલાલ જોશી, જયન્ત પાઠક
- પ્રકાશક : ગુજરાતી સાહિત્ય પરિષદ
- વર્ષ : 1981