હાથ જોડીને અરથ ચાલ્યો ગયો

હાથ જોડીને અરથ ચાલ્યો ગયો,

મૌનના શરણે પરત ચાલ્યો ગયો.

હાથનું પૂછો તો એના એ જ છે,

ટેરવાંમાંથી કસબ ચાલ્યો ગયો.

કોણ જાણે કેવું ફાટ્યું'તું ખમીસ?

ટેભા લેવામાં જનમ ચાલ્યો ગયો!

ફૂલની ચર્ચા જગત કરતું રહ્યું,

મ્હેકથી મ્હેકી પવન ચાલ્યો ગયો!

લ્યો, હવે તો ફૂલ ડૂબી જાય છે!

તરતા પથ્થર એ વખત ચાલ્યો ગયો.

હમસફર સમજી હતી પરછાંઈને,

સાંજ ઢળતાં એ ભરમ ચાલ્યો ગયો.

કાં હજી ‘રાકેશ’ બેઠો છે અહીં?

ઘેર જા, આખો મલક ચાલ્યો ગયો.

haath jodiine arath chaalyo gayo