રેખ્તા
હિન્દવી
સૂફીનામા
રાજસ્થાની
ગુમ
gum
અરવિંદ ભટ્ટ
અરવિંદ ભટ્ટ
બત્તી કરું ને જેમ થતો અંધકાર ગુમ
ક્યાં એમ થઈ શકે છે તમારો વિચાર ગુમ
ને બર્ફ જેમ ઓગળી શકાય પણ નહીં
મારામાં કોઈ થઈ ગયું છે આરપાર ગુમ
એ ભુલભુલામણી છે પુરાતન મહેલની
અંદર પ્રવેશ આપીને થઈ જાય દ્વાર ગુમ
પાદરના પથ્થરોને હજુ યે પૂછ્યા કરું
કે ક્યાં થઈ ગયો છે એ ઘોડેસવાર ગુમ
દેખાય જો મને તો સલામત રહે નહીં
તેથી જ થઈ ગયો છે એ પરવરદિગાર ગુમ
સ્રોત
- પુસ્તક : ગઝલ 81-82 (પૃષ્ઠ ક્રમાંક 14)
- સંપાદક : હર્ષદ ચંદારાણા
- પ્રકાશક : રૂપાલી પબ્લીકેશન
- વર્ષ : 1983