ઘૂઘવતા દૃશ્યના સાતેય સાગર પાર કરવા છે

ઘૂઘવતા દૃશ્યના સાતેય સાગર પાર કરવા છે,

પછી દૃષ્ટિ અને દ્રષ્ટાને એકાકાર કરવાં છે.

પ્રવાહી થઈ ગયેલા આ પવનમાં આંગળી બોળી,

સમયના ભાલ પર પીળાં તિલક બે-ચાર કરવાં છે.

ત્વચા પર ચોળવી છે રાખ ભસ્મીભૂત સ્પર્શોની,

સળગતા શ્વાસના કૂવાને ઠંડાગાર કરવા છે.

હવામાં ઝૂલતા સૌ મૌનના પડદાઓ ફાડીને,

અતિશય આર્તનાદે સેંકડો ચિત્કાર કરવા છે.

ઉછીની પણ કોઈ કૂંપળ સમી પળ એક આપે તો,

યુગોની શુષ્કતાઓને લીલા શણગાર કરવા છે.

ghuughavtaa drushyanaa saatey saagar paar karvaa chhe