ઘર નથી હોતાં કદીયે ઘર બધાં

ઘર નથી હોતાં કદીયે ઘર બધાં,

કેમ હો અવસર પછી અવસર બધા?

માળીનું સપનું છે આ ફૂલો વિશે,

એકબીજાનો કરે આદર બધા!

બે ટકાનો પ્રેમ લેશો કોઈનો,

સો ટકાનું માંગશે વળતર બધા.

એક પણ પળ ત્યાં તું રોકાતો નહીં,

જે નગરમાં લાગતા સુંદર બધા.

પ્રશ્નરૂપી અંત પામ્યા આખરે

જોઈતા’તા એમને ઉત્તર બધા!

મોત, હું માણસ છું સીધી લીટીનો,

આવજે તું છોડીને ચક્કર બધાં.

ghar naathii hotaa. kadiiye ghar badhaan