ગમતી'તી જે મજા તે ત્યાગી તો કેવી ત્યાગી!

ગમતી'તી જે મજા તે ત્યાગી તો કેવી ત્યાગી!

સરખાઈ મારા મનમાં આવી તો કેવી આવી!

ખોલી શકે બધું ને વાસી શકે ના કંઈ પણ,

આપી છે અમને એણે ચાવી તો કેવી ચાવી!

ના સાવ રહી અલગ કે ના સાવ પાસપાસે,

ચાલી છે જિંદગી પણ આડી તો કેવી આડી!

એ વાર કરવા ટાણે બે હાથ જોડી બેઠો,

કાતિલે થાપ અમને આપી તો કેવી આપી!

ભીંતોથી હું હણાયો, પૂજાયો ચાર ખૂણે,

ખોડાઈ ઘરમાં મારી ખાંભી તો કેવી ખાંભી.

હંમેશ માટે નહિતર એક કોયડો હતી એ,

મૃત્યુની પળને છેવટ સાંખી તો કેવી સાંખી!

અંદર સમાતી નહોતી, લખતાં લખાતી નહોતી,

તો પણ ગઝલને અશરફ! છાપી તો કેવી છાપી!

gamtii'tii je maja te tyaagii to kevii tyaagii