તેં વાત કરી તારી સહિયરને તારી મોટી ભૂલ છે!
મેં  એવું  ક્યારે  કહ્યું  તને?  તું  કેસુડાનું  ફૂલ છે!

ગઈ રાતે ચૂપચાપ, આગિયા ભરી કાચની પેટીથી
                                     મેં કાગળ તારો વાંચ્યો,
સાત વખત મુખપાઠ કરી, પેટારો ખોલી હળવેથી
                                        મેં ગડી કરીને રાખ્યો,

મેં કહ્યું કોઈને? તેં લખ્યું : હું બગલી તું મેહૂલ છે!
તેં વાત કરી તારી સહિયરને તારી  મોટી ભૂલ છે!

મેળામાં જાવાનું, પોટો પડાવવાનું, ચકડોળે ચડવાનું
                                      જે કંઈ વચન હતું તે ફોક,
પર્વત  પરથી  ધસી  આવતી  શીલા  જેવો  ગુસ્સે  છું
                                             તું રાણક હો તો રોક!

હવે બોલવું, હળવું-મળવું, સઘળી વાત ફિઝૂલ છે!
તેં  વાત  કરી તારી  સહિયરને  તારી મોટી ભૂલ છે!
મેં  એવું  ક્યારે   કહ્યું  તને  તું?  કેસુડાનું   ફૂલ  છે!